इराण-इस्रायल आणि अमेरिकासह मध्य पूर्व देशांमध्ये सुरू असलेल्या युद्धजन्य परिस्थितीचा थेट परिणाम सोन्या चांदीच्या बाजारावर होत असल्याचे चित्र आहे. आंतरराष्ट्रीय तणाव, हवाई वाहतूक बंद आणि माल आयात ठप्प झाल्याने मौल्यवान धातूंच्या दरात मोठी वाढ झाली आहे. सोने व्यापारी १२१ फत्तेचंद रांका यांनी दिलेल्या माहितीनुसार सोन्याच्या दरात प्रति तोळा तब्बल १५ ते २० हजार रुपयांची वाढ झाली आहे. तर चांदीच्या दरात किलोमागे सुमारे ३० हजार रुपयांची उसळी पाहायला मिळत आहे.

युद्धाचे वातावरण असल्याने आंतरराष्ट्रीय बाजारातून माल येणे बंद झाले आहे. विशेषतः हवाई वाहतूक खंडित झाल्यामुळे पुरवठ्यावर परिणाम झाला असून त्याचा थेट फटका बाजाराला बसत आहे. दरम्यान बँकांकडूनही मोठ्या प्रमाणात सोन्याची खरेदी सुरू असल्याने मागणी वाढली आहे. भारताला दरवर्षी सुमारे ९०० टन सोन्याची गरज भासते. अशा परिस्थितीत पुरवठा कमी आणि मागणी जास्त असल्याने दर आणखी वाढण्याची शक्यता व्यक्त केली जात आहे.

येत्या काही दिवसांत गुढीपाडवा, अक्षय तृतीया तसेच लग्नसराईचा हंगाम सुरू होत आहे. पारंपरिकरीत्या या काळात सोन्याची खरेदी मोठ्या प्रमाणात होते. मात्र वाढत्या दरामुळे ग्राहकांच्या खरेदीवर परिणाम होण्याची शक्यता आहे. युद्ध परिस्थिती कायम राहिली तर येत्या काळात सोन्या-चांदीचे दर आणखी वाढत राहतील असा अंदाज व्यापाऱ्यांकडून व्यक्त केला जात आहे.