Cyrus Poonawalla buys Ravi Varma Painting : भारतीय कला क्षेत्रात एक ऐतिहासिक घडामोड घडली असून, Cyrus Poonawalla यांनी प्रख्यात चित्रकार राजा रवि वर्मा यांचे सुप्रसिद्ध ‘यशोदा आणि कृष्ण’ हे चित्र तब्बल १६७.२ कोटी रुपयांना विकत घेतले आहे. सॅफ्रनआर्ट द्वारे आयोजित लिलावात हे चित्र सुमारे १८ दशलक्ष डॉलर्स म्हणजेच १६७.०२ करोडला विकले गेले. यामुळे हे चित्र आधुनिक भारतीय कलेच्या इतिहासातील सर्वात महागड्या कलाकृतींपैकी एक ठरले आहे.

या खरेदीमुळे भारतीय कला बाजारात नवा रेकॉर्ड करण्यात आला आहे. याआधीएम. एफ. हुसेन यांच्या ‘ग्राम यात्रा’ या चित्राने रेकॉर्ड केला होता. हे चित्र किरण नाडर यांनी १८ कोटी रुपयांहून अधिक किमतीला खरेदी केले होते. मात्र, ‘यशोदा आणि कृष्ण’ चित्राने हा रेकॉर्ड ब्रेक केला आहे.

पूनावाला यांनी या ऐतिहासिक खरेदीचे वर्णन एक 'सन्मान' आणि त्याच वेळी एक 'महत्त्वाची जबाबदारी' असे केले आहे. त्यांनी असे नमूद केले की, हे चित्र भारताच्या सांस्कृतिक वारशाचा एक अविभाज्य भाग आहे आणि ते सर्वसामान्य जनतेला पाहता यावे यासाठी त्याचे वेळोवेळी प्रदर्शन भरवले गेले पाहिजे.

१८१८ मध्ये जन्मलेले राजा रवि वर्मा हे भारतीय कलेतील अत्यंत महत्वाचे चित्रकार होते. त्यांनी युरोपियन चित्रकलेच्या तंत्रांचा वापर भारतीय पौराणिक विषयांसोबत करून एक अनोखा संगम साधला. १८९४ मध्ये त्यांनी लिथोग्राफिक प्रेसची स्थापना करून आपल्या चित्रांच्या प्रती सामान्य लोकांपर्यंत पोहोचवल्या ज्यामुळे त्यांच्या कलेचा प्रभाव घराघरात पोहोचला.

‘यशोदा आणि कृष्ण’ हे चित्र विशेषतः मातृत्वाच्या प्रेमाचे सुंदर दर्शन घडवते. माता यशोदा आणि बालकृष्ण यांच्यातील मायेच्या नात्याचे अत्यंत संवेदनशील चित्रण यात पाहायला मिळते. १८९० च्या दशकात साकारलेले हे चित्र रवि वर्मांच्या कारकिर्दीतील उत्कृष्ट कलाकृतींपैकी एक मानले जाते.