मध्यपूर्वेत वाढत चाललेल्या तणावाचे पडसाद आता भारतातही स्पष्टपणे उमटताना दिसत आहेत. आंतरराष्ट्रीय पातळीवरील घडामोडींमुळे इंधन दरवाढीचा फटका पुन्हा एकदा सर्वसामान्य नागरिकांना बसला आहे. पेट्रोल आणि डिझेलच्या किमती आधीच वाढलेल्या असताना आता सीएनजीच्या दरातही २ रुपयांनी वाढ झाली असल्याने नागरिकांच्या खिशाला मोठा झटका बसत आहे.

मंगळवार, २६ मे २०२६ रोजी दिल्लीत सीएनजीच्या दरात प्रति किलो २ रुपयांची वाढ करण्यात आली. या वाढीनंतर राजधानीत सीएनजीचा दर ८३.०९ रुपये प्रति किलो इतका झाला आहे. विशेष म्हणजे गेल्या ११ दिवसांत ही चौथी वाढ असून, दरवाढीचा वेग पाहता पुढील काळात आणखी वाढ होण्याची शक्यता वर्तवली जात आहे.

यापूर्वीच पेट्रोल आणि डिझेलच्या किमतींमध्ये सातत्याने वाढ होत आहे. कालच या दोन्ही इंधनांच्या दरात मोठी वाढ करण्यात आली होती. त्यामुळे वाहतूक खर्च वाढण्याची शक्यता असून त्याचा थेट परिणाम महागाईवर होणार आहे. याशिवाय एलपीजी गॅस सिलेंडरच्या दरातही वाढ झाल्याने घरगुती बजेट कोलमडण्याची भीती व्यक्त केली जात आहे.

देशातील विविध शहरांमध्ये सीएनजीचे दर वेगवेगळे आहेत. नोएडामध्ये सीएनजीचा दर ९१.७० रुपये असून गाझियाबादमध्ये तो तब्बल १०२.९० रुपयांवर पोहोचला आहे. मुंबईत सध्या ८४ रुपये प्रति किलो दराने सीएनजी उपलब्ध आहे, तर पुण्यात ९२.५० रुपये दर आहे. कोलकाता, चेन्नई, बंगळूर आणि हैदराबादमध्येही दर ९० रुपयांच्या पुढे गेले आहेत.

तज्ज्ञांच्या मते, मध्यपूर्वेतील तणाव, कच्च्या तेलाच्या किमतीतील चढ-उतार आणि पुरवठ्यातील अडचणी यामुळे भारतात इंधन दरवाढीचा दबाव वाढत आहे. या पार्श्वभूमीवर केंद्र सरकारकडून काही उपाययोजना केल्या जातील का, याकडे सर्वांचे लक्ष लागले आहे. दरम्यान, सतत वाढणाऱ्या इंधन दरांमुळे सर्वसामान्य नागरिकांचे आर्थिक गणित बिघडले असून, महागाईतून दिलासा कधी मिळणार? हा प्रश्न पुन्हा एकदा ऐरणीवर आला आहे.