मालमत्तेमुळे वाद होत असतात. मालमत्तेच्या वादामुळे गुन्हे देखील घडतात. प्रॉपर्टीवरून वाद होऊ नये, यासाठी भारतीय संविधानात मालमत्तेबाबत अनेक प्रकारचे कायदे आणि नियम बनवण्यात आलेत. आज आपण अशा एका कायद्याबद्दल जाणून घेणार आहोत. या कायद्याबद्दल खूप कमी लोकांना माहितीये. एखाद्या सूनेला तिच्या सासू आणि सासऱ्यांच्या मालमत्तेवर दावा करता येतो का? हा प्रश्न अनेकांना पडत असतो किंवा अनेकजण त्याबाबत विचारणा करत असतात.
सासू आणि सासऱ्यांच्या मालमत्तेवर कोणाचा अधिकार आहे, याबद्दल अनेक प्रकारचे कायदे करण्यात आले आहेत. त्यामुळे अनेकजणांना सून आणि सासू-सासऱ्याच्या प्रॉपर्टीवरून प्रश्न पडत असतो. सूनेचा तिच्या सासरच्यांच्या मालमत्तेवर अधिकार असतो का? या प्रश्नानंच उत्तर आहे नाही. सूनेला तिच्या सासू आणि सासऱ्यांनी कमावलेल्या मालमत्तेवर कोणताही कायदेशीर अधिकार नसतो. लग्नानंतर जेव्हा मुलगी तिच्या पतीच्या घरी जाते, तेव्हा तिला तिच्या सासरच्या लोकांच्या मालमत्तेवर कोणताही अधिकार किंवा दावा करता येत नसतो.
सूनेला तिच्या पतीमार्फत तिच्या सासू-सासऱ्यांच्या स्वतःच्या मालमत्तेवर अधिकार मिळतो. जर सासरच्यांना त्यांची स्वतःची मिळवलेली मालमत्ता सूनेला द्यायची असेल तर ते तसे करू शकतात. परंतु, जर सासू आणि सासरे त्यांची स्वतःची मिळवलेली मालमत्ता सुनेला देऊ इच्छित नसतील, तर सून त्या मालमत्तेवर दावा करू शकत नाही. सासू आणि सासरे त्यांची स्वतःची मिळवलेली मालमत्ता कुटुंबातील कोणत्याही सदस्याला मृत्युपत्राद्वारे देऊ शकतात.
कायद्यानुसार, जर एखाद्या कुटुंबाकडे वडिलोपार्जित मालमत्ता असेल तर सून त्या मालमत्तेवर दावा करू शकते. सूनेला वडिलोपार्जित मालमत्तेत फक्त दोन प्रकारे वाटा मिळू शकतो. जर तिचा पती मालमत्तेतील त्याच्या वाट्याचे हक्क तिच्या नावावर करतो, तेव्हा तिला संपत्ती वाटा मिळत असतो. याशिवाय पतीचा मृत्यू झाला तर सून वडिलोपार्जित मालमत्तेवर दावा करू शकते. मात्र सासू-सासऱ्यांनी कमावलेल्या मालमत्तेवर सून दावा करू शकत नाही.
कायद्यानुसार, सूनेला HUF (Hindu Undivided Family) च्या सदस्याचा दर्जा देतो, पण त्यामुळे ती सह-मालकीण होत नसते. हिंदू उत्तराधिकार कायद्यानुसार, सह-मालक म्हणजे जी व्यक्ती जी केवळ हिंदू अविभाजित कुटुंबात (HUF) जन्म झाल्यामुळे त्याच्या वडिलोपार्जित मालमत्तेवर कायदेशीर अधिकार प्राप्त करत असते. हिंदू उत्तराधिकार कायदा १९५६ च्या तरतुदींनुसार, HUF मध्ये जन्मलेल्या कोणत्याही व्यक्तीला जन्मापासून सह-भागीदार मानले जाते.
सकाळ+चे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.