परभणी : मागील तीन दिवस राज्यातील विविध भागात अवकाळी पाऊस झाला. या पावसामुळे पिकांना फटका बसला असून (Farmer) शेतकऱ्यांचे प्रचंड नुकसान झाले आहे. यात परभणी (Parbhani) जिल्ह्यात झालेल्या अवकाळी पाऊस व वादळी वाऱ्यामुळे सुमारे ५४ हजार हेक्टर क्षेत्राला फटका बसला आहे. तसा प्राथमिक अहवाल प्रशासनाकडून समोर आला आहे. (Latest Marathi News)

हवामान विभागासह परभणीतील वसंतराव नाईक मराठवाडा कृषी विद्यापीठाच्या ग्रामीण मौसम सेवा विभागाने जिल्ह्यासह मराठवाड्यात चार ते पाच दिवस मध्यम आणि जोरदार पावसाची शक्यता वर्तवली होती. त्यानुसार परभणी जिल्ह्यात २७ व २८ नोव्हेंबरला झालेल्या वादळी वाऱ्यासह मुसळधार पावसाने (Rain) खरीप हंगामातील कापूस, तूर व रबी हंगामातील ज्वारी, हरभरा या चार पिकांचे मोठे नुकसान झाले आहे. जिल्हा अधीक्षक कृषी अधिकारी कार्यालयाने अतिवृष्टी व अवकाळी पावसामुळे बाधित झालेल्या प्राथमिक अहवालानुसार जिल्ह्यात ५३ हजार ९७६ हेक्टर क्षेत्रावर पिकांचे नुकसान झाले आहे.

 ('साम टीव्ही'चं व्हॉट्सअँप चॅनल जॉईन करण्यासाठी येथे क्लिक करा)

तातडीने पंचनामे करण्याचे आदेश 

शेतातील पिकांचे नुकसान झाल्याने जिल्ह्यातील शेतकरी पुरता कोलमडला आहे. या नुकसानीनंतर शेतकरी आर्थिक कोंडीत सापडला आहे. संबंधित शेतकऱ्यांना आधार देण्यासाठी पालकमंत्र्यांसह जिल्हाधिकारी रघुनाथ गावडे तातडीने  पंचनामे करण्याचे आदेश महसूल व कृषी विभागाला दिले आहेत.