जळगाव : जळगाव जिल्ह्यातील मागील आठवड्यात दोन शेतकरी आत्महत्या झाल्याच्या घटना घडल्यानंतर आता सलग दुसऱ्या दिवशी शेतकऱ्याने जीवन संपविले आहे. डोक्यावर असलेल्या कर्जबाजारीपणातून शेतकऱ्याने टोकाचे पाऊल उचलत आत्महत्या केल्याचे समोर आले आहे. 

जळगाव (Jalgaon) तालुक्यातील दापोरा दशरथ भिमराव तांदळे (वय ५४) असे मृत शेतकऱ्याचे नाव आहे. दापोरा गावात दशरथ तांदळे हे पत्नी, मुलगा, मुलीसह राहत होते. शेतीकाम करून ते परिवाराचा उदरनिर्वाह करीत होते. त्यांनी शेतीसाठी कर्ज घेतले होते. (Farmer) तसेच खासगी सावकाराकडून घेतलेल्या रक्कमेमुळे कर्ज वाढले होते. शेतातून अपेक्षित उत्पन्न मिळत नसल्याने कर्ज कसे फेडायचे या चिंतेत दशरथ तांदळे होते. 

कर्ज फेडता येत नसल्याच्या विवंचनेत दशरथ तांदळे यांनी राहत्या घरी छताला गळफास घेऊन आत्महत्या केली. ही बाब कुटुंबियांना समजतात त्यांनी तातडीने शासकीय रुग्णालयात त्यांना दाखल केले. तेथे वैद्यकीय अधिकारी यांनी तपासणी करून त्यांना मृत घोषित केले. कुटुंबीयांनी आक्रोश केला. याबाबत जळगाव तालुका पोलिस ठाण्यात आकस्मिक मृत्यूची नोंद झाली आहे. जळगाव जिल्ह्यात मागील आठवडाभरात चौथी शेतकरी आत्महत्या आहे.