धुळे : ठिबक सिंचन योजनेचे अनुदान रखडले असून ते लवकर देण्यात यावे; या प्रमुख मागणीसाठी स्वाभिमानी शेतकरी संघटनेच्यावतीने आज धुळ्यात आक्रोश मोर्चाचे आयोजन करण्यात आले होते. जिल्हाधिकारी कार्यालयावर आक्रोश मोर्चा काढण्यात आला असून जिल्हाधिकारी कार्यालयाच्या परिसरात असलेल्या क्यूमाईन क्लब या ठिकाणी मोठ्या संख्येने मोर्चेकर्‍यांनी आंदोलन करत प्रचंड घोषणाबाजी केली. 

गेल्या दोन वर्षांपासून थकीत असलेले ठिबक सिंचन योजनेचे अनुदान लवकरात लवकर देण्यात यावे, त्याचबरोबर सरसकट कर्जमाफी करण्यात यावी. तसेच दोन वर्षांपासून न मिळाली पीक विम्याची रक्कम देखील (Farmer) शेतकऱ्यांची तात्काळ देण्यात यावी. शासनातर्फे शेतकऱ्यांना ५० हजार रुपये प्रोत्साहनपर अनुदान जाहीर केल्यानंतर ते अनुदान फक्त ५० टक्के शेतकऱ्यांना मिळाले असून उर्वरित शेतकऱ्यांना ते लवकरात लवकर देण्यात यावे. या आणि आणखी प्रलंबित मागण्यासाठी हा आक्रोश मोर्चा काढण्यात आला आहे. 

शासनाविरोधात घोषणाबाजी 
धुळे (dhule) जिल्हाधिकारी कार्यलयावर स्वाभिमानी शेतकरी संघटनेतर्फे काढण्यात आलेल्या या आक्रोश मोर्चामध्ये मोठ्या संख्येने जिल्हाभरातील शेतकरी सहभागी झाले होते. यावेळी या सर्व मोर्चेकरांनी शासनाच्या विरोधात मोठ्या प्रमाणात घोषणाबाजी करत कर्जमाफी करा, पीक विम्याची रक्कम अदा करा; अशा मागण्या केल्या. याबाबतचे निवेदन जिल्हाधिकारी यांना देण्यात आले.