Sambhajinagar Rain : संभाजीनगर जिल्ह्यात पावसाची जोरदार हजेरी; कोवळ्या पिकांना जीवदान

रामू ढाकणे 

छत्रपती संभाजीनगर : छत्रपती संभाजीनगर जिल्ह्यातील पाचोडसह आसपासच्या परिसरात जोरदार पावसाला सुरुवात झाली आहे. मागील काही दिवसांपासून पावसाने दडी मारली होती. यानंतर आलेल्या पावसामुळे जमिनीतून बाहेर आलेल्या कोवळ्या पिकांना जीवदान मिळाले आहे. 

मान्सूनचा पाऊस (Rain) सुरवातीला आल्यानंतर बहुतांश शेतकऱ्यांनी पेरणी करून टाकली होती. या पावसात पिके उगवली होती. मात्र त्यानंतर पावसाने दडी मारली होती. दरम्यान मागील तीन- चार दिवसांपासून कडक उन्हाचे चटके जाणवू लागले होते. परिणामी कोवळी पिके कोमेजून जात होती. यामुळं शेतकरी चिंतेत पडला होता. दरम्यान आज दुपारच्या सुमारास संभाजीनगर (Sambhajinagar) जिल्ह्यातील काही भागात पावसाने हजेरी लावली. 

अचानक सुरू झालेल्या या वादळी वाऱ्यासह पावसामुळे चांगलीच दाणादाण उडाली. मागील अर्ध्या तासापासून पावसाची जोरदार बॅटिंग सुरू आहे. त्यामुळे (Farmer) शेतकऱ्यांना चांगलाच दिलासा मिळाला आहे. तरी अजुनही मोठ्या पावसाची प्रतीक्षा शेतकऱ्यांना आहे. दरम्यान नुकत्याच लागवड झालेल्या कपाशी पिकांसह ईतर कोवळ्या पिकांना तात्पुरत जीवदान मिळाले आहे.