Garlic Price : लसणाच्या दरात दुपटीने वाढ; पालेभाज्यांचे दरही कडाडले

छत्रपती संभाजीनगर : किरकोळ व होलसेल बाजारात लसणाच्या दरात वाढ झाल्याचे पाहण्यास मिळत आहे. काही दिवसांपूर्वी दीडशे रुपये किलो दराने विकला जाणारा लसूणाचे दर आता तीनशे रुपयांच्या वर पोहचले आहेत. याशिवाय भाजीपाल्यांचे दर देखील भरमसाठ वाढल्याने गृहिणींचे बजेट कोलमडले आहे. 

छत्रपती संभाजीनगरच्या जाधववाडी भाजी मार्केटमध्ये गावरान लसणाचा भाव ५०० रुपये किलोवर गेला आहे. तर साध्या लसणाचा भाव तीनशे रुपयांपर्यंत गेला आहे. त्यामुळे लसणाची झणझणीत फोडणी आता महागली आहे. महिनाभरापूर्वी गावरान लसणाचा भाव एका किलोला अडीचशे रुपये होता. घाऊक बाजारात त्यापेक्षा चढ्या दराने भाजी विक्रेते विकत आहे. आवक घटल्याने दुपटीपेक्षा जास्त भाव वाढला आहे. 

शेतकऱ्यांकडील लसूण येणे अजून बाकी 

दरम्यान स्थानिक शेतकऱ्यांकडून अद्याप लसूण बाजारात आला नाही. शिवाय बाहेरच्या राज्यातून येणारा लसूण देखील कमी प्रमाणात येत असल्यानं लसणाच्या भावात मोठी वाढ झाली आहे. आणखी काही दिवस लसणाचे भाव चढेच राहतील असा अंदाज आहे. याशिवाय भाजीपाल्याच्या दरात देखील मोठ्या प्रमाणात वाढ झाली आहे. यामुळे गृहिणींचे नजरेत कोलमडले आहे. 

तुरीच्या दरात घसरण

वाशीम : नवीन तूर बाजारात येण्यासाठी अवघा एक महिन्याचा कालावधी बाकी आहे. असे असताना तुरीच्या दरात सातत्याने घसरण होत असल्याच पाहायला मिळत आहे. वाशिमच्या कारंजा कृषी उत्पन्न बाजार समितीमध्ये तुरीला काल ८ हजार ६०० रुपये दर मिळाला. तर वाशिम बाजार समितीतही ९ हजारपर्यंत तुरीचे दर होते. गेल्या काही दिवसात तुरीच्या दरात एक ते दीड हजार रुपयाची घसरण झाली आहे. मागील हंगामात तुरीला १२ हजार पर्यंतचे उच्चांकी दर मिळाल्यानं यावर्षी तुरीच्या पेऱ्यात वाढ झाली होती. आता दरात घसरण होत असल्यानं शेतकरी चिंतेत आहे.