Onion Price : कांदा उत्पादकांसाठी आनंदाची बातमी; लासलगाव बाजार समितीत कांद्याला उच्चांकी दर

अजय सोनवणे 

मनमाड (नाशिक) : राज्यात एकीकडे विधानसभा निवडणुकीची धामधूम सुरू असताना दुसरीकडे मात्र कांद्याच्या दराने रेकॉर्ड केला. नाशिकच्या लासलगावसह सर्वच बाजार समित्यांमध्ये उन्हाळ कांद्याला ६ हजार तर लाल कांद्याला ५ हजार रुपये प्रतिक्विंटल उच्चांकी दर मिळाला आहे.. 

नाशिक जिल्ह्यातील लासलगाव परिसरात कांद्याची मोठ्या प्रमाणात लागवड करण्यात येत असते. तसेच येथील (Bajar Samiti) बाजार समितीत देखील कांद्यांची आवक मोठी असते. अनेकदा शेतकऱ्यांनी बाजार समितीत कांदा विक्रीसाठी आणल्यानंतर त्याला चांगला दर मिळत नसतो. यामुळे शेतकरी आर्थिक संकटात सापडत असतो. मिळेल त्या (Onion Price) दरात कांदा विक्री करावा लागत असतो. मात्र यंदाच्या हंगामात शेतकऱ्यांना चांगला दर मिळत असल्याने शेतकरी आनंदात आहे.  

यंदा अति पाऊस व परतीच्या पावसामुळे कांद्याचे नुकसान झाले आहे. सध्या कांद्याची आवक घटल्याने कांद्याच्या दरात वाढ होत असल्याचे सांगितले जात आहे. इतर वेळी अत्यल्प दराने शेतकऱ्यांना रडवणारा कांदा काही दिवस ग्राहकांच्या डोळ्यात पाणी आणणार आहे. बाजार समितीत उन्हाळी कांदा ६ हजार प्रतिक्विंटल तर लाल कांद्याला ५ हजाराचा दर मिळत आहे.