Nandurbar News : पाऊस लांबल्याने ५ हजार हेक्टरवरील पिके धोक्यात; शहादा, तळोदा आणि अक्कलकुवा तालुक्यात पावसाची प्रतीक्षा

सागर निकवाडे 

नंदुरबार : राज्यात मान्सून दाखल झाला असून अनेक भागात दमदार पाऊस झाल्याने पेरण्या पूर्ण झाल्या आहेत. मात्र काही भागात थोडा पाऊस पडून नंतर पावसाने ओढ दिली आहे. नंदुरबार जिल्ह्यातील काही भागात पाऊस लांबल्याने साधारण ५ हजार हेक्टरवर पेरणी झालेल्या क्षेत्रातील पिके धोक्यात आहेत. 

नंदुरबार (Nandurbar) जिल्ह्यातील शहादा, तळोदा आणि अक्कलकुवा तालुक्यात दहा दिवसापूर्वी कोसळलेल्या पावसाच्या बळावर शेतकऱ्यांनी पेरण्या केल्या होत्या. जमिनीत ओलावा असल्याने जमिनीबाहेर कोम येऊन पिके उगवली आहेत. मात्र आता या पेरण्यांना पावसाची (Rain) गरज असून तब्बल 5 हजार हेक्टरवरच्या पिके पावसाअभावी धोक्यात आली आहेत. यामुळे शेतकऱ्यांच्या नजरा आता आकाशाकडे लागल्या आहेत.

नंदुरबार जिल्ह्यात तापमानाचा पारा जवळपास ४० अंश सेल्सिअस आहे. यातून जमिनीत ओलावा संपला असून टोचणी केलेल्या बियाण्याला धोका निर्माण होत आहे. कृषिपंपांची पाणी पातळी खालावली असल्याने बागायती पिकांना पाणी देण्यासाठी शेतकऱ्यांची मोठीच दमछाक होत आहे. आगामी आठवडाभरात पाऊस न पडल्यास पेरणी केलेले बियाणे वाया जाण्याची शक्यता वर्तवली जात आहे.