Soyabean Crop : सोयाबीन, तुर पीक धोक्यात; पिकांवर कीड आणि उंट अळीचा प्रादुर्भाव वाढला

संदीप भोसले 
लातूर : लातूर जिल्ह्यातील सोयाबीन उत्पादक शेतकरी यंदा कोणत्या ना कोणत्या कारणाने अडचणीत सापडल्याचे चित्र दिसत आहे. मागील वर्षी गोगलगायींच्या प्रादुर्भावामुळे जिल्हाभरातील शेतकरी त्रस्त होते. तर यंदा पिकांचे पान खाणाऱ्या हिरव्या उंट अळ्यांचा प्रादुर्भाव मोठ्या प्रमाणात वाढला आहे. यामुळे सोयाबीन पीक धोक्यात आले आहे. 

लातूर (Latur) जिल्ह्यात यंदा सोयाबीनची मोठ्या प्रमाणात लागवड करण्यात आली आहे. सोबतच तूर पिकाची देखील लागवड करण्यात आली आहे. मागील दहा- बारा दिवसांपासून पावसाची संततधार सुरु होती. त्यातच मागील आठवड्यात सतत पावसाची रिपरीप चालू असल्याने पिकांची मशागत पूर्ण होऊ शकली नाही. यामुळे (Soyabean Crop) सोयाबीनचे पीक पिवळे पडत आहे. तर कीड आणि आळी प्रादुर्भावमुळे सोयाबीनसह तूर पीक धोक्यात आले आहेत. 

शेतकरी संकटात 

सततच्या पावसामुळे (Rain) पिकांवर रोगराई वाढली आहे. यातच सोयाबीन व तुरीवर अळीचा प्रादुर्भाव अधिक वाढल्याने ते आटोक्यात आणण्यासाठी शेतकरी आता फवारणी करू लागला आहे. यामुळे शेतकऱ्यांना फवारणीसाठी आर्थिक खर्चाचा सामना करावा लागत आहे. पिकांवर आलीच प्रादुर्भाव वाढल्याने उत्पादनात घट होण्याची शक्यता निर्माण झाली आहे. परिणामी शेतकरी संकटात सापडला आहे.