Cotton Price: शेतकऱ्यांच्या आशेवर पाणी..कापसाचे दर एक हजाराने कमी

जळगाव : कापूस उत्पादक शेतकऱ्यांनी कापसाला दहा ते १३ हजारांचा दर मिळावा, यासाठी ९० टक्के कापूस घरात ठेवला आहे. असे असताना, कापसाच्या दरात तब्बल एक हजारांची घसरण झाली. यामुळे कापूस उत्पादक शेतकऱ्यांची कापूस दराबाबतची (Cotton Price) चिंता आणखी वाढली आहे. शेतकऱ्यांना दराबाबत आशा होती, त्यावर पाणी फिरण्याची चिन्हे आहेत. (Maharashtra News)

मागील आठवड्यात आठ ते साडेआठ हजारांचा दर कापसाला (Cotton) होता. यामुळेच ‘सीसीआय’ने ८ आठ हजार ४०० रुपये दराने खुल्या बाजारात खरेदी सुरू करण्याचे सांगितले होते. आता मात्र कापसाचे दर कमी झाल्याने ‘सीसीआय’ काय दराने कापूस घेणार याबाबत शेतकऱ्यांमध्ये (Farmer) उत्सुकता आहे.

९५ टक्‍के कापूस घरातच पडून

यंदा कापसाचा पेरा ११० टक्के झाला होता. परतीच्या पावसाने अनेक ठिकाणी कपाशीचे नुकसान झाले असले, तरी चांगले उत्पादन हाती आले होते. बाजारात कापसाला आठ ते नऊ हजारांचा दर होता. मात्र, शेतकरी कापसाला दहा ते १३ हजारांचा दर मिळावा, यासाठी कापूस विक्रीस आणीत नव्हते. ९५ टक्के कापूस घरात असताना, शेतकऱ्यांनी कापूस विक्रीस आणावा, यासाठी जिनिंग चालक कापसाला दर देत होते.