Jalgaon News : कर्जबाजारी शेतकऱ्याने उचलले टोकाचे पाऊल

जळगाव : शेतीसाठी घेतलेल्या कर्जाची परतफेड कशी करायची या विचारातून कर्जबाजारी शेतकऱ्याने जीवनयात्रा संपविल्याची घटना समोर आली आहे. एरंडोल तालुक्यातील खेडगाव येथे हि घटना घडली असून उपचार सुरु असताना शेतकऱ्याचा मृत्यू झाला आहे. या प्रकरणी पोलिसात नोंद करण्यात आली आहे.

खेडगाव (ता. एरंडोल) येथील किसन मोरसिंग राठोड (वय ४६) असे मृत शेतकऱ्याचे नाव आहे. शेतकरी किसन यांनी शेतीसाठी कर्ज काढले होते. मात्र घेतलेले हे कर्ज फेडता येत नसल्याने ते खूप दिवसांपासून नैराश्यात होते. शेवटी कर्जाला कंटाळून त्यांनी १५ जूनला घरी असताना विषारी द्रव प्राशन केले. त्यांना अस्वस्थ वाटू लागल्याने कुटुंबीयांनी तातडीने जळगाव येथील शासकीय वैद्यकीय महाविद्यालयात दाखल केले. 

दरम्यान रुग्णालयात उपचार सुरु असताना १८ जूनला त्यांचा मृत्यू झाला. याबाबत माहिती मिळताच कुटुंबीयांनी रुग्णालयात (Farmer) एकच आक्रोश केला. त्यांच्या पश्चात पत्नी लताबाई आणि अनिल व सुनील असे दोन मुले आहेत. जिल्हा पेठ पोलिसात मृत्यूची नोंद करण्यात आली आहे.