Lightning Strike : पाऊस येणार म्हणून सोयाबीनची गंज झाकण्याची लगबग; वीज कडाडली अन् घडले भयानक

बालाजी सुरवसे 

धाराशिव : राज्यातील काही भागात मुसळधार पावसाची शक्यता वर्तविण्यात आली आहे. त्यानुसार धाराशिव जिल्ह्याच्या परिसरात पावसाचे आगमन झाले आहे. यामुळे शेतात काढणीला आलेला सोयाबीन कापून शेतात ठेवला होता. मात्र पाऊस येणार असल्याने सोयाबीन एका ठिकाणी जमा करून झाकण्याची लगबर सुरु असताना, वीज पडून युवकाचा मृत्यू झाल्याची घटना घडली. 

धाराशिवच्या (Dharashiv) कळंब तालुक्यातील भाटशिरपुरा गावांमध्ये वीज पडुन युवक ठार झाल्याची घटना घडली आहे. या घटनेत अजय आसाराम गायकवाड असे मृत्यु झालेल्या युवकाचे नाव आहे. शनिवारी सायंकाळच्या दरम्यान पावसामुळे शेतातील सोयाबीन भिजत असल्याने अजय गायकवाड यांनी सोयाबीनची गंज झाकून ठेवण्याची तयारी करत होता. याच दरम्यान वीज (Lightning Strike) पडली यातच अजय यांचा मृत्यू झाला आहे.

पीक आवरण्याची लगबग 

येत्या आठवड्यात मुसळधार पावसाची शक्यता हवामान विभागाने वर्तविली आहे. यामुळे शेतकरी शेतातील कामे आवरण्याचा तयारीत आहेत. प्रामुख्याने सोयाबीन पीक आता काढणीला आले असल्याने अनेकांनी सोयाबीन कापून ठेवला आहे. तसेच लवकर लागवड केलेल्या मका देखील काढणीवर आला असून शेतकरी याच्या तयारीला लागला आहे.