Bhandara News : विहिरीत उतरलेल्या शेतकऱ्यांसोबत घडले दुर्दैवी; विषारी वायूमुळे गुदमरून झाला मृत्यू

भंडारा : पिकांना सिंचनासाठी शेतात विहीर केली आहे. या विहिरीत लावलेला विद्युत मोटार पंप बाहेर काढण्यासाठी विहिरीत उतरलेल्या शेतकऱ्याचा विहिरीत निर्माण झालेल्या विषारी वायूमुळे गुदमरून मृत्यू झाला. सदरची घटना भंडारा जिल्ह्याच्या परसोडी नाग शेत शिवारात घडली असून १८ तासांनंतर शेतकऱ्याचा मृतदेह बाहेर काढण्यात आला. 

भंडारा (Bhandara) जिल्ह्यातील परसोडी नाग येथील रामचंद्र टिकाराम बावनकुळे (वय ५७) असे घटनेत मृत झालेल्या शेतकऱ्याचे नाव आहे. शेतकऱ्याने काही वर्षांपूर्वी विहीर बांधून आपल्या शेतीच्या पिकांना सिंचनासाठी विद्युत मोटर पंप लावला होता. मात्र गेल्या दोन दिवसांपासून जिल्ह्यात झालेल्या मुसळधार पावसामुळे मोठ्या प्रमाणात पाणी साचले होते. पीडित शेतकऱ्याला (Farmer) विहिरीत पावसाचे पाणी साचल्याचे आढळून आले. या स्थितीत विहिरीत बसवलेला विद्युत मोटार पंप पाण्यात बुडून खराब होण्याची भीती असल्याने पीडित शेतकरी घटनेच्या दिवशी विहिरीत लावलेला मोटार पंप काढण्यासाठी विहिरीत उतरले होते.  

शेतकरी रामचंद्र बावनकुळे होते. यावेळी विहिरीत निर्माण झालेल्या विषारी वायूने विहिरीत त्यांचा जीव गुदमरायला लागला. यात त्यांना बाहेर निघता न आल्याने त्यांचा गुदमरून मृत्यू झाला. मोटारपंप बाहेर काढण्यासाठी शेतकरी विहिरीत उतरून विहिरीत साचलेल्या पाण्यात पडले असता शेतात उपस्थित असलेल्या कुटुंबीयांनी या घटनेची माहिती पोलिसांसह स्थानिक ग्रामस्थांना दिली. यानंतर तब्बल १८ तासांनंतर मृतदेह बाहेर काढण्यात आला.