महिलेनं धावत्या लोकलवर फेकला दगड, VIDEO व्हायरल, मुंबई पोलिसांची एन्ट्री झाली अन् सत्य आलं समोर

Viral : सोशल मीडियावर व्हायरल होणाऱ्या व्हिडीओमध्ये एक वृद्ध महिला चालत्या लोकल ट्रेनच्या दाराशी उभी राहून शेजारच्या ट्रॅकवर येणाऱ्या ट्रेनवर मोठा दगड फेकताना दिसते. ही घटना मुंबईत घडल्याचा अनेकांनी दावा केला आहे. या व्हिडीओची सोशल मीडियावर मोठी चर्चा पाहायला मिळत आहे. मुंबई पोलिसांनी या व्हिडीओच्या खाली कमेंट करत त्यामागील सत्य समोर आणले आहे.

व्हायरल व्हिडीओमध्ये वृद्ध महिला एक मोठा दगड हातात घेत समोरून येणाऱ्या ट्रेनच्या मोटरमनच्या केबिनवर मारत असल्याचे पाहायला मिळते. दगड फेकल्यानंतर ती ट्रेनवर ओरडताना दिसते. ती नक्की काय बोलते हे समजत नसले तरी तिच्या या कृत्यामुळे सोशल मीडियावर संताप व्यक्त केला जात आहे. अनेकांनी या व्हिडीओखाली मुंबई पोलिसांना टॅग केले आहे.

व्हायरल पोस्टमुळे सुरुवातीला दिशाभूल झालेल्या मुंबई पोलिसांच्या अधिकृत एक्स अकाउंटने व्हिडीओच्या कमेंट बॉक्समध्ये मुंबई गव्हर्नमेंट रेल्वे पोलीस (जीआरपी) दलाला चौकशीसाठी टॅग केले. मिळालेल्या माहितीनुसार, हा व्हिडीओ पूर्व रेल्वे नेटवर्क अंतर्गत येणाऱ्या एखाद्या प्रदेशातून आला असल्याचे दिसते. हा व्हिडीओ मुंबईमधील नाहीये असेही स्पष्ट करण्यात आले आहे. याशिवाय ट्रेनची रचना मुंबईतील लोकल ट्रेनसारखी नसल्याचे काही यूजर्सनी म्हटले आहे. ट्रेनवर ER असे लिहिलेले दिसते. मुंबई आणि आसपासच्या परिसरात ER विभागांतर्गत लोकल ट्रेन धावत नाहीत.

अधिकाऱ्यांनी घटनेचे ठिकाण कुठले आहे हे सांगितले नसले, तरीही व्हायरल व्हिडीओला प्रतिसाद देताना, ही बाब संबंधित अधिकाऱ्यांकडे पाठवण्यात आला आहे. पोलिसांनी @ErRpf" @ErRpf ने त्यानंतर हावडा आणि सियालदाह स्थानकांच्या आरपीएफला थ्रेडमध्ये टॅग केले. महिलेवर कारवाई होईल असे आश्वासनही देण्यात आले आहे.