चोरी झाली, चोरी झाली अशी सकाळी सकाळी बोंब उठली. ठिकाण होतं कर्नाटकातल्या तुमकुरू येथील विश्वास ज्वेलर्स...सकाळी ज्वेलर्समधील कर्मचाऱ्यांनी दुकानाचं शटर उघडलं. दुकानात शिरल्या शिरल्या कर्मचाऱ्यांच्या लक्षात आलं की दागिने चोरीला गेले. त्या दागिन्यांची किंमत होती तब्बल १० लाख रुपये. मग सुरू झाली फोनोफोनी. दुकानात नुकता कल्लोळ माजला. कर्मचाऱ्यांच्या चेहऱ्यावर टेन्शन आणि थोडी भीतीही होती. चोरी तर झालीय. पण ती केली कुणी? दागिने लंपास कोणी केले? अशा एक ना अनेक प्रश्नांचा काहूर त्या कर्मचाऱ्यांच्या मनात माजला. आता चोरीची तक्रार पोलिसांत करायलाच हवी, असं त्या कर्मचाऱ्यांच्या मनात आलं. नेमकं काय करावं कुणालाही सूचत नव्हतं. इतक्यात एकदा दुकानातील सीसीटीव्ही फुटेज तपासावेत, असं लक्षात आलं. फुटेज तपासले. चोरी तर झाली होती. चोरही त्या व्हिडिओत दिसत होते. कॅमेऱ्यात कैद झालेले ते चोर बघून सगळेच एकमेकांकडे बघायला लागले. चोरांचे चेहरे बघून खरे तर टेन्शन वाढतं. पण या कॅमेऱ्यात कैद झालेल्या चोराला बघून मालकाचा जीव भांड्यात पडला. या चोरीचा आणि चोराचा व्हिडिओ सोशल मीडियावर व्हायरल होत आहे.
विश्वास ज्वेलर्समधून दहा लाखांचे दागिने चोरीला गेले. त्यामुळे सकाळी जो कर्मचारी आला त्याच्या तर पायाखालची वाळूच सरकली. चोरी झाल्याची बोंब उठली. विशेष म्हणजे दुकानाचे शटर सहीसलामत होते. काही तोडफोड झालेली नव्हती. टाळं वैगेरे सगळं ठिकठाक होतं. मग दागिने गायब कसे झाले, चोर आत कसे घुसले? असा प्रश्न त्या कर्मचाऱ्यांना पडला.
ज्वेलर्समध्ये सकाळी सकाळी तणावाचं आणि भीतीचं वातावरण होतं. पोलिसांत जायला तर हवं. पण त्याआधी एकदा दुकानातील सीसीटीव्ही फुटेज तपासून बघूया असं कर्मचाऱ्याच्या मनात आलं. फुटेज बघितल्यानंतर सगळ्यांनाच आश्चर्याचा धक्का बसला. चोर दुसरा तिसरा कुणी नाही, तर चक्क उंदीर होता. त्यानंच दागिन्यांवर डल्ला मारला होता, असं दिसून आलं. तो उंदीर एकेक दागिना उचलून बिळात म्हणजे आपल्या निवासस्थानी नेत असल्याचं दिसून आलं. फुटेजच्या आधारे मग कर्मचाऱ्यांनी उंदराच्या बिळाचा शोध घेतला. त्यात सोन्याच्या १० अंगठ्या आणि तीन चेन मिळाल्या. त्यानंतर त्या ज्वेलर्स मालकाचा जीव भांड्यात पडला. उंदराने केलेल्या चोरीचा व्हिडिओ आता सोशल मीडियावर तुफान व्हायरल होत आहे.