Viral News : देवा माझी सासू मरू दे...कलियुगी सूनेचं विचित्र साकडं, मंदिराच्या दानपेटीत टाकली चिठ्ठी

Belagavi Raybag Huli Kanteshwar Temple Viral Prayer Note आपण देवाकडे मागताना बुद्धी, संपत्ती, यश, आरोग्य मागतो मात्र एका महिलेने चक्क स्वतःच्या सासूचा मृत्यू मागितला आहे. ही कोणत्याही मराठी मालिकेतील कथा नसून बेळगाव जिल्ह्यातील रायबाग तालुक्यात घडलेली घटना आहे. एका मंदिरातील दानपेटीत सापडलेल्या चिठ्ठीची सर्वत्र चर्चा आहे. या चिठ्ठीत एका सुनेने 'देवा, पुढच्या यात्रेआधी माझी सासू मरु दे' असा लिहलेल्या मजकुराची चिठ्ठी दानपेटीत सापडली आहे.

खणदाळ तालुक्यातील रायबाग येथे हुली कांतेश्वर नावाचे मंदिर आहे. या मंदिरातील काही अधिकाऱ्यांनी दानपेटीतील रक्कम मोजण्यासाठी दानपेटी उघडली. यावेळी रक्कम मोजताना शंभर व दहा रूपये मूल्य असलेली नोट एकत्रित गुंडाळलेली होती. ती उघडली तेव्हा त्यामध्ये एक चिठ्ठी देखील आढळून आली.

या चिठ्ठीमध्ये "देवा माझे कष्ट दूर कर, पुढच्या यात्रेच्या अगोदर माझी सासू मरू दे, असा मजकूर लिहिलेला आहे. हा मजकूर कन्नडमध्ये असून तो वाचल्यानंतर पैसे मोजण्यासाठी बसलेल्या यात्रा कमिटीच्या सदस्यांच्या चेहऱ्यावरही हसू फुटले. त्यामुळे कमिटीतील एकाने हा फोटो सोशल मिडियावर व्हायरल केला आहे. या चिठ्ठीची सध्या सर्वत्र चर्चा सुरु आहे.