Maharashtra Politics: शेकडो वाहनांचा ताफा, चांदीची तलवार; विलास शिंदें भव्य शक्तिप्रदर्शनासह मुंबईला रवाना, ठाकरे गटाला मोठा दणका|VIDEO

अभिजीत सोनवणे, साम टीव्ही

नाशिक: उपमुख्यमंत्री एकनाथ शिंदे यांनी आपल्या व्यस्त दौऱ्यातून वेळ काढून काही दिवसांपूर्वी ठाकरे गटाचे महानगरप्रमुख विलास शिंदे यांच्या कन्येच्या विवाहसोहळ्याला उपस्थिती लावली होती. त्याचवेळी विलास शिंदे हे शिंदेंच्या शिवसेनेत जातील असे वृत्त होते. अखेर तो दिवस आज उजाडला असून नाशिकहून शेकडो वाहनांचा ताफा घेऊन शक्तिप्रदर्शन करत आज मुंबईला रवाना होत आहे. विलास शिंदे यांच्यासोबत 8 माजी नगरसेवक, 12 जिल्हा परिषद सदस्य, 40 हून अधिक सरपंच, जिल्हा बँक, बाजार समितीचे आज माजी पदाधिकारी करणार शिंदेंच्या शिवसेनेत प्रवेश करणार आहे. सुधाकर बडगूजर यांच्या पाठोपाठ ठाकरे गटातील मोठा चेहरा शिंदेंच्या शिवसेनेत गेल्याने ठाकरे गटाला अवघ्या एक महिन्यात दूसरा मोठा दणका मानला जात आहे.

पक्षप्रवेशाला जाण्यापूर्वी विलास शिंदे साम टीव्हीशी संवाद साधताना म्हणाले की, तीस वर्षांपासून शिवसेनेत काम करतो आहे. 1996 पासून शाखा प्रमुख आहे. मला कुठलाही राजकीय वारसा नाहीये. साडे तीन वर्षापूर्वी शिवसेनेत गट पडले. आमच्या समोर त्यांची प्रतिमा चुकीची दाखवली गेली. पण आम्ही जेव्हा त्यांच्याकडे कामे घेऊन गेलो तेव्हा एकनाथ शिंदेंनी आमचा पक्ष, गट नाही बघितला आमचे कामे केले. तेव्हा आमच्या लक्षात आले की बाळसाहेबांची शिवसेना पुढे घेऊन जाण्याचं काम एकनाथ शिंदे करत आहे असे स्तुतिसुमन शिंदेंनी एकनाथ शिंदे यांच्यावर उधळली आणि ज्या शिवसेनेत आम्ही 30 वर्ष कामे केली. त्यांनी आमच्या कामाचे मूल्यमापनच केले नाही अशी खंतही त्यांनी ठाकरे गटाप्रति बोलून दाखवली. दरम्यान आज पक्ष प्रवेशावेळी विलास शिंदे यांच्याकडून एकनाथ शिंदे यांना चांदीची तलवार देखील भेट देण्यात येणार आहे.