शिंदेंचं ऑपरेशन टायगर रोखण्यासाठी उद्धव ठाकरेंचं 'सीक्रेट ऑपरेशन'?

एकनाथ शिंदेंच्या ऑपरेशन टायगरनं (Operation Tiger) महाराष्ट्राचं राजकारण पुरतं ढवळून निघालंय. या ऑपरेशन टायगरचा सर्वात मोठा झटका उद्धव ठाकरे गटाला बसणार असल्याची चर्चा आहे. ठाकरेंचे सात खासदार शिंदेंच्या संपर्कात असल्याची जोरदार चर्चा आहे. शिंदेंच्या काही नेत्यांनी तसा दावा केला आहे. तर सर्व काही आलबेल आहे, असं ठाकरे गटाच्या नेत्यांकडून सांगितलं जात आहे. ऑपरेशन टायगरची चर्चा सुरू असतानाच, ठाकरेंनी मातोश्रीवर खासदारांची बैठक बोलावली. या बैठकीला काही खासदारांनी ऑफलाइन, तर काहींनी ऑनलाइन उपस्थिती लावली. तर, ज्याला जायचं त्यानं खुशाल जावं, असा पवित्रा उद्धव ठाकरेंनी (Uddhav Thackeray) घेतल्याची चर्चा होती.

गेल्या काही दिवसांपासून चर्चेत असलेल्या ऑपरेशन टायगरमुळं उद्धव ठाकरेंच्या गटात जोरदार हालचाली सुरू झाल्या आहेत. ठाकरे गटाचं टेन्शन वाढलं आहे. आता शिंदेंचं ऑपरेशन टायगर रोखण्यासाठी स्वतः उद्धव ठाकरे मैदानात उतरले आहेत. त्यांनी हे ऑपरेशन थांबवण्यासाठी प्रयत्न सुरू केले असल्याचे सूत्रांकडून सांगण्यात आले. रिपोर्ट्सनुसार, ठाकरे सेनेच्या नेत्यांकडून खासदारांशी संपर्क साधला जात आहे. प्रत्येक खासदारासोबत वैयक्तिकरित्या संपर्क साधून त्यांचं मत ऐकून घेतलं जात असल्याचं सूत्रांचं म्हणणं आहे. संबंधित खासदारांची मते ऐकून पक्षाच्या वरिष्ठ नेत्यांपर्यंत ती पोहोचवली जाणार असल्याचेही बोलले जाते.