Nilesh Rane VIDEO: प्रतिबंधात्मक आदेश असतानाही काढला मोर्चा, निलेश राणेंसह 450 जणांवर गुन्हा दाखल

रत्नागिरी: रविवारी गोहत्या होत असल्याच्या मुद्द्यावरून हिंदू संघटनांतर्फे मोर्चा आणि रास्तारोको काढण्यात आला. या प्रकरणी भाजप नेते निलेश राणे यांच्यासह एकूण 450 जणांविरोधात शहर पोलिस ठाण्यात गुन्हा दाखल करण्यात आला आहे. रविवारी दुपारी 11.30 ते 2.35 या कालावधीत मारुती मंदिर शिवसृष्टी, माळनाका ते जेलरोड असा मोर्चा काढत रास्ता रोको करण्यात आला होता. यावेळी जिल्ह्यात प्रतिबंधात्मक आदेश लागू होते. पण त्यानंतर देखील मोर्चा निघाला. शिवाय रास्ता रोको आंदोलन देखील करण्यात आले. त्यामुळे जारी केलेल्या प्रतिबंधात्मक आदेशाचे उल्लंघन केल्याप्रकरणी हा गुन्हा दाखल करण्यात आला आहे. असं असलं तरी दाखल केलेल्या गुन्ह्यांची माहिती देण्यासाठी पोलिसांकडून मात्र टाळाटाळ केली जात आहे.