राजू शेट्टींना अटक होण्याची शक्यता; एकीकडे चर्चा सुरू असतानाच आंदोलनस्थळी पोलीस फौजफाटा वाढवला

स्वाभिमानी शेतकरी संघटनेकडून माजी खासदार राजू शेट्टी यांच्या नेतृत्त्वात ऊस दरासाठी कोल्हापूर आणि सातारा जिल्ह्यात राष्ट्रीय महामार्ग क्रमांक 48 वर आंदोलन सुरुय. जवळपास ५५ तासानंतर सरकारनं राजू शेट्टींना चर्चेला बोलवलंय. आज रात्रीपर्यंत सरकारनं मागणी पूर्ण केली नाहीतर जिल्ह्यांमध्ये बंद पुकारण्यात येईल, असा इशारा राजू शेट्टी यांच्याकडून देण्यात आला. त्यानंतर सरकारनं आंदोलनस्थळ असलेल्या किनी टोल नाका परिसरात पोलीस बंदोबस्त वाढवलाय. जर चर्चा फिस्कटली तर आंदोलन मोडीत काढत राजू शेट्टी यांना अटक केली जाऊ शकते. कोल्हापूर जिल्हाधिकारी कार्यालयात सरकारचे शिष्टमंडळ आणि आंदोलकाच्या शिष्टमंडळाची बैठक सुरू आहे. त्याच दरम्यान पोलीस बंदोबस्त वाढवण्यात आलाय.