पक्षाच्या संपर्क कार्यालयातच महिलेवर बलात्कार; ठाकरे सेनेच्या नेत्याला अटक|VIDEO

अहिल्यानगर शहर शिवसेना उद्धव बाळासाहेब ठाकरे गटाचे शहर प्रमुख किरण गुलाबराव काळे यांच्या विरोधात कोतवाली पोलीस ठाण्यात बलात्काराचा गुन्हा दाखल करण्यात आला आहे. एका २१ वर्षीय विवाहित महिलेने दिलेल्या फिर्यादीवरून, किरण काळे यांच्यावर भारतीय दंड विधान कलम ३७६(१), ५०४ आणि ५०६ अंतर्गत गुन्हा नोंदविण्यात आला आहे.

तक्रारीनुसार, पीडित महिला आणि तिच्या पतीमध्ये सतत वाद होत असल्याने, मदतीच्या शोधात ती किरण काळे यांच्या संपर्कात आली होती. मदत करण्याचे आमिष दाखवत किरण काळे यांनी २०२३ ते २०२४ दरम्यान स्वतःच्या संपर्क कार्यालयात वारंवार बलात्कार केला, असा आरोप महिलेने केला आहे. तसेच ही बाब कुणाला सांगितल्यास जीवे मारण्याची धमकीही दिल्याचे तक्रारीत नमूद आहे. या प्रकरणी कोतवाली पोलिसांनी तत्काळ कारवाई करत किरण काळे यांना ताब्यात घेतले असून, पुढील तपास सुरू आहे.