आम्ही एकत्रच! शरद पवार, अजित पवार, सुप्रिया सुळे एकत्र; बॅनर पुण्यात, पण चर्चा महाराष्ट्रात | VIDEO

पुण्याच्या राजकीय वर्तुळात सध्या एका फ्लेक्सची जोरदार चर्चा सुरू आहे. त्याचं कारणही तसंच आहे. या फ्लेक्सवर शरद पवार, उपमुख्यमंत्री अजित पवार आणि खासदार सुप्रिया सुळे यांचे फोटो आहेत. पण या फ्लेक्सवरील मजकुरानं सगळ्यांचं लक्ष वेधून घेतलंय. आम्ही एकत्रच असा मथळा त्यावर आहे. त्यामुळं सगळ्यांच्याच भुवया उंचावल्या आहेत.

आगामी काळात स्थानिक स्वराज्य संस्थांच्या निवडणुका होऊ घातल्या आहेत. त्यामुळं सगळीकडं राजकीय जुळवाजुळव सुरू आहे. अनेक पक्षांमध्ये इनकमिंग सुरू आहे. पक्षप्रवेश होत आहेत. राजकीय पक्षांचे स्थानिक पदाधिकारी, कार्यकर्त्यांकडून बॅनरबाजी सुरू आहे. अजित पवार यांच्या राष्ट्रवादी काँग्रेसचा कार्यकर्ता करण गायकवाड यांनीही पुण्यात एक बॅनर लावलंय. हा बॅनर जरी पुण्यात लागला असला तरी, त्यावरचे फोटो आणि मजकूर अख्खा महाराष्ट्र ढवळून काढणारा आहे.

शरद पवार, अजित पवार आणि सुप्रिया सुळे यांचे फोटो या बॅनरवर आहेत. त्यावर आम्ही एकत्रच असा मजकूरही आहे. विचार वेगळे असले तरी,आम्ही कुटुंब म्हणून एकत्र आहोत. आम्ही चिंता करत नाही. गरज पडल्यास ताई-दादा एकत्र येणार आमचा विश्वास, अशा आशयाचा मजकूर या बॅनरवर आहे. त्यामुळे सध्या या बॅनरची जोरदार चर्चा सुरू आहे.