Maharashtra Politics: सुधाकर बडगुजर म्हणजे नाशिकची शिवसेना नाही-संजय राऊत|VIDEO

नाशिक येथील ठाकरे गटाचे उपनेते सुधाकर बडगुजर यांनी दोन दिवसापूर्वी मुख्यमंत्री देवेंद्र फडणवीस यांची भेट घेतली होती. यानंतर सर्वांच्याच राजकीय भुवया उंचावल्या होत्या. मात्र, ही भेट राजकीय नसून कामगारांचे काही प्रश्न होते यामुळे ही भेट घेतली असे बडगुजर यांनी स्पष्ट केले होते. तर पक्षात संघटनात्मक बदल करत असताना आम्हाला विश्वासात घेतले नाही. त्यामुळे 10 ते 12 जण नाराज आहे असा गौप्यस्पोट बडगुजर यांनी केल्यानंतर ते नाराज असल्याचे दिसले.

याबाबत ठाकरे गटाचे खासदार संजय राऊत यांना विचारले असता ते म्हणाले, बडगुजर म्हणजे शिवसेना नाही ते आमचे सहकारी आहे ते सध्या शिवसेनेत आहे त्यामुळे मी जास्त बोलणार नाही, असे म्हणत काही वेळातच नाशिकमध्ये शिवसेना मध्यवर्ती कार्यालय येथे पत्रकार परिषद सुरू असताना माजी जिल्हाप्रमुख दत्ता गायकवाड यांना संजय राऊत यांनी फोन करून सुधाकर बडगुजर यांची पक्षातून हकालपट्टी केले असल्याचे सांगितले. पक्षविरोधी कारवाई केल्यामुळे त्यांच्यावर ही कारवाई केल्याचे सांगितले जात आहे.