Gopichand Padalkar: विधानभवनात हाणामारी करणारा पडळकर समर्थक ऋषिकेश टकलेची वाजतगाजत मिरवणूक|VIDEO

विधिमंडळातील हाणामारी प्रकरणात अटक होऊन नंतर जामिनावर सुटलेले गोपीचंद पडळकर यांचे कट्टर समर्थक ऋषिकेश टकले यांच्या सन्मानार्थ कळंबोलीत मायाक्का मंदिर परिसरात मिरवणूक काढण्यात आली. या मिरवणुकीत ढोलताशा वाजवण्यात आला. महाराष्ट्र विधानभवनाच्या परिसरातील हाणामारी प्रकरणी भाजपाचे आमदार गोपीचंद पडळकर आणि राष्ट्रवादी (शरद गट) आमदार जितेंद्र आव्हाड यांच्या समर्थकांमध्ये विधानसभेच्या लॉबीमध्ये तीव्र वाद आणि मारामारी झाली. सुरुवातीला वाद झाले, नंतर दोन्ही गटांमध्ये एकमेकांवर हल्ले झाले.

दोन्ही पक्षांचे कार्यकर्ते राष्ट्रवादी काँग्रेस पार्टी शरद पवार गट नितीन देशमुख व भाजपा‑चे ऋषिकेश टकले यांना अटक करण्यात आली होती. दोघांच्या वर परस्परविरोधी गुन्हे दाखल करण्यात आले होते.

आज टकले यांची जामीनावर मुक्तता झाल्यानंतर ते आटपाडी या ठिकाणी गावी जाण्यासाठी निघाले असता गोपीचंद पडळकर यांचे समर्थक व ऋषिकेश टकले यांच्या मित्रमंडळींनी कळंबोली या ठिकाणी त्यांची वाजत गाजत मिरवणूक काढली.