Rahul Gandhi Fine : राहुल गांधींना 200 रुपयांच्या दंडाची शिक्षा, नेमकं काय आहे प्रकरण?

काँग्रेस खासदार आणि लोकसभेचे विरोधी पक्षनेते राहुल गांधी हे लखनऊ न्यायालयात बुधवारी पुन्हा अनुपस्थित राहिले. त्यामुळे न्यायालयानं तीव्र नाराजी व्यक्त करत त्यांना २०० रुपयांच्या दंडाची शिक्षा सुनावली. तसेच पुढील सुनावणीला हजर राहण्याचे आदेश दिले.

राहुल गांधी यांनी स्वातंत्र्यवीर सावरकर यांच्याबद्दल वक्तव्य केले होते. या वक्तव्यामुळं समाजात वैमनस्य आणि द्वेष पसरत असल्याचा आरोप करत राहुल गांधी यांच्याविरोधात न्यायालयात याचिका दाखल करण्यात आली होती. त्यावर लखनऊ न्यायालयात सुनावणी सुरू आहे. राहुल गांधी या सुनावणीला सातत्याने अनुपस्थित राहत असल्यानं न्यायालयानं तीव्र नाराजी व्यक्त केली. त्यांना २०० रुपयांचा दंड केला. तसेच पुढील सुनावणीला हजर राहण्याचे आदेश दिले. पुढील सुनावणीला हजर न राहिल्यास कठोर कायदेशीर कारवाई करण्यात येईल, अशी समजही दिली.