पुण्यात थरार! भिडे पुलाजवळ तरुणाची दगडाने ठेचून निर्घृण हत्या, नेमकं कारण काय ?

पुण्यातील नदीपात्रातील भिडे पुलाजवळ एका अज्ञात तरुणाची निर्घृण हत्या झाल्याची धक्कादायक घटना समोर आली आहे. या घटनेमुळे परिसरात एकच खळबळ उडाली असून नागरिकांमध्ये भीतीचे वातावरण आहे.

धारदार शस्त्राने वार करून आणि डोक्यात दगड घालून ही हत्या करण्यात आली असल्याचा प्राथमिक अंदाज पोलिसांनी व्यक्त केला आहे. ही घटना आज पहाटेच्या सुमारास घडली असावी, अशी शक्यता वर्तवण्यात येत आहे. घटनेची माहिती मिळताच पुणे पोलिसांनी तातडीने घटनास्थळी धाव घेतली असून अधिक तपास सुरू केला आहे. अद्याप मृत तरुणाची ओळख पटलेली नाही.

पुराव्यांच्या संकलनासाठी फॉरेन्सिक टीम पाचारण करण्यात आली असून, ती घटनास्थळी तपासणी करत आहे. ही हत्या पूर्ववैमनस्यातून झाली की अन्य कोणत्या कारणातून, याचा शोध पोलीस घेत आहेत.