Solapur News : सोलापूरमधून अजित पवारांना मोठा धक्का, निरंजन भूमकरांनी 'तुतारी' हाती घेतली | Marathi News

सोलापूरमध्ये मोठी राजकीय घडामोड घडली आहे. राज्याचे उपमुख्यमंत्री अजित पवार यांना सोलापूरमधून मोठा धक्का बसला आहे. अजित पवार गटाचे निरंजन भूमकर यांनी शरद पवार यांच्या गटात प्रवेश करत तुतारी हाती घेतली आहे. त्यामुळे विधानसभा निवडणुकीच्या रिंगणात सोलापूर विधानसभा मतदारसंघातून अजित पवार यांना हा मोठा धक्का म्हणावा लागणार आहे.

विधानसभा निवडणुकीच्या पार्श्वभूमीवर राज्यात राजकीय घडामोडींना वेग आला आहे. तिकीट न मिळाल्याने नाराजी नाट्य सुरू असून अनेक नाराजांकडून बंडखोरी किंवा पक्ष सोडण्याचे प्रकार समोर येत आहे. सोलापूरमध्ये देखील अजित पवार गटाचे बार्शी तालुक्यातील नेते निरंजन भूमकर यांनी राष्ट्रवादी शरद पवार गटात प्रवेश केला. शरद पवारांच्या उपस्थितीत गोविंद बाग येथे निरंजन भूमकरांचा पक्षप्रवेश सोहळा पार पडला. वैराग नगरपंचायतीचे उपनगराध्यक्ष निरंजन भूमकर यांच्यासह १५ नगरसेवकांनी राष्ट्रवादी शरद पवार गटात प्रवेश केला. निरंजन भूमकर हे वैराग नगरपंचायतीचे उपनगराध्यक्ष तसेच जिल्हा नियोजन समितीचे सदस्य आहेत. वैराग नगरपंचायतीवर निरंजन भूमकर यांची एक हाती सत्ता आहे. भूमकर यांनी अजित पवारांची साथ सोडल्याने विधानसभेत याचा मोठा फटका अजित पवारांना बसण्याची शक्यता आहे.

Edited By Rakhi Rajput