Mumbai Local: मुसळधार पावसाचा फटका, एसी लोकलमध्ये गळती; महिलांचा छत्री घेऊन प्रवास; पाहा VIDEO

मुंबईमध्ये मुसळधार पाऊस पडत आहे या पावसामुळे मुंबईकरांचे चांगलेच हाल होताना दिसत आहे. या पावसाचा फटका लोकलसेवेला देखील बसत आहे. आधीच लोकल उशिराने धावत आहेत. त्यात आता एसी लोकलमध्ये पावसाच्या पाण्यामुळे गळती होत असल्याचा एक व्हिडीओ समोर आला असून तो व्हायरल होत आहे. एसी लोकलमध्ये पाणी गळती होत असल्यामुळे महिला प्रवाशांना छत्री उघडी करून बसावे लागले. तर काही महिला प्रवाशांनी डोक्यावर प्लास्टिकची पिशवी ठेवून प्रवास केला.

मिळालेल्या माहितीनुसार, ठाणे ते सीएसएमटी एसी लोकलमध्ये हा प्रकार घडला. ही लोकल सकाळी ९.०३ च्या सुमारास ठाण्यावरून सुटली. लोकलमध्ये पावसामुळे पाणी गळत असल्यामुळे प्रवाशांचे चांगलेच हाल झाले. पावसाचे पाण्याचा त्रास होत असल्यामुळे अनेक प्रवाशांना डोक्यावर छत्री आणि प्लास्टिक पिशव्या घेऊन प्रवास करावा लागला. एसी लोकलमधून प्रवास करण्यासाठी महागडे तिकीट काढून सुद्धा प्रवाशांना हा अशापद्धतीने प्रवास करावा लागत आहे. त्यामुळे प्रवाशांनी संताप व्यक्त केला आहे.