सकाळ सकाळ मुंबईकरांचे हाल, फटाक्यामुळे रेल्वे सिग्नलला आग; पश्चिम रेल्वे ३५ मिनिटे उशिराने

आठवड्याच्या पहिल्याच दिवशी सोमवारी सकाळी पश्चिम रेल्वेवरून प्रवास करणाऱ्या चाकरमान्यांचे हाल झाले आहेत. विरार आणि नालासोपारा रेल्वे स्थानकांदरम्यान रेल्वे सिग्नल यंत्रणेला फटाक्यांमुळे आग लागल्याची घटना घडली. यामुळे पश्चिम रेल्वेची वाहतूक पूर्णपणे विस्कळीत झाली असून, विरारहून चर्चगेटच्या दिशेने जाणाऱ्या लोकल गाड्या तब्बल ३० ते ३५ मिनिटे उशिराने धावत आहेत.

सकाळच्या गर्दीच्या वेळीच हा तांत्रिक बिघाड झाल्यामुळे नोकरी आणि व्यवसायासाठी घराबाहेर पडलेल्या हजारो कर्मचाऱ्यांना कामावर पोहोचण्यास लेटमार्क लागला आहे. विरार आणि नालासोपारा स्थानकांवर प्रवाशांची प्रचंड गर्दी झाली असून, रेल्वे प्रशासनाकडून गाड्या उशिराने धावत असल्याची माहिती ध्वनिक्षेपकावरून (माईकवर) सातत्याने दिली जात आहे.

घटनेची माहिती मिळताच रेल्वेच्या तांत्रिक पथकाने घटनास्थळी धाव घेतली असून, सिग्नल यंत्रणेच्या दुरुस्तीचे काम युद्धपातळीवर सुरू करण्यात आले आहे. वाहतूक लवकरात लवकर पूर्ववत करण्याचे प्रयत्न सुरू असल्याचे रेल्वे प्रशासनाकडून सांगण्यात आले.