ST Bus Accident: ३० विद्यार्थ्यांना घेऊन जाणाऱ्या एसटी बसला डंपर धडकला | VIDEO

मुक्ताईनगर-मलकापूर दरम्यान मोठा अपघात घडला असून भरधाव वेगाने येणाऱ्या डंपरने एसटी बसला जोरदार धडक दिली. या अपघातात ३० विद्यार्थ्यांसह एकूण ४५ प्रवासी असलेल्या बसमधील ७ प्रवासी आणि बस चालक जखमी झाले आहेत.

ही दुर्घटना गुरुवारी सकाळच्या सुमारास घडली. मुक्ताईनगरहून मलकापूरकडे जाणारी एसटी बस महामार्गावर जात असताना अचानक भरधाव डंपरने समोरून येत जोरात धडक दिली. धडकेमुळे बसच्या पुढील भागाचे मोठे नुकसान झाले असून बसचालकासह काही प्रवाशांना गंभीर दुखापत झाली आहे. अपघातानंतर परिसरात एकच गोंधळ उडाला. स्थानिक नागरिकांनी तातडीने मदतीसाठी पुढे येत जखमींना नजीकच्या रुग्णालयात दाखल केले. पोलिसांनी घटनास्थळी धाव घेत वाहतूक सुरळीत करण्याचे काम सुरू केले असून डंपरचालकाविरुद्ध गुन्हा दाखल करण्याची प्रक्रिया सुरू आहे. दरम्यान, या अपघाताने प्रवासी आणि पालकांमध्ये भीतीचे वातावरण निर्माण झाले असून एसटी महामंडळाने या प्रकरणाची चौकशी सुरू केली आहे.