Mallikarjun Reddy : भाजपच्या मल्लिकार्जुन रेड्डींची पक्षातून हकालपट्टी; निवडणुकीच्या तोंडावर मोठी कारवाई

ब्रिजमोहन पाटील, रामटेक

विधानसभा निवडणुकीच्या तोंडावर भाजपनं मोठी कारवाई केली आहे. भाजपचे रामटेकमधील स्थानिक नेते मल्लिकार्जुन रेड्डी यांची पक्षातून हकालपट्टी करण्यात आली आहे. आशिष जयस्वाल यांच्या उमेदवारीला रेड्डी यांनी जाहीरपणे विरोध केला होता. जयस्वाल यांची उमेदवारी एकनाथ शिंदे यांनी जाहीर केली होती. त्याला रेड्डींनी विरोध केला होता. तोच विरोध करणं रेड्डींना महागात पडलं आहे. भाजपनं त्यांची पक्षातून हकालपट्टी करण्यात आली. हा मतदारसंघ शिवसेनेचा पारंपरिक मतदारसंघ आहे. तिथे सहाजिकच शिवसेनेचा दावा असणे हे स्वाभाविक होते, असे बोलले जात आहे. २०१९ मध्ये जयस्वाल हे अपक्ष उमेदवार म्हणून निवडून आले. हा मतदारसंघ शिवसेनेकडे जाणे जवळपास निश्चित होते. मात्र, रेड्डी यांनी या मतदारसंघावर दावा सांगून निवडणूक लढणार असल्याचं सांगितलं होतं. तसेच राज्यातील पक्षनेतृत्वावर प्रश्न उपस्थित करतानाच टीकाही केली. त्यामुळं त्यांच्यावर ही कारवाई करण्यात आल्याचे सांगितले जाते. ही आजची कारवाई आगामी काळात पक्षविरोधी कारवाया, बंडखोरीच्या तयारीत असणाऱ्या इतर पदाधिकारी, नेत्यांसाठी इशारा असल्याचे मानले जाते.