Maharashtra Weather : कोकण-विदर्भाला पावसाचा अलर्ट, वाचा आज राज्यात कसं असेल हवामान

Maharashtra Weather Update News : भारतीय हवामान खात्याने (IMD) कोकण आणि विदर्भात पुढील काही दिवसांत जोरदार पावसाचा अंदाज वर्तवला आहे. कोकणातील रत्नागिरी, सिंधुदुर्ग, रायगड आणि अलिबागसह गोव्यात मुसळधार ते अति मुसळधार पावसाची शक्यता आहे. यामुळे या भागात पूरपरिस्थिती निर्माण होण्याचा धोका आहे. हवामान खात्याने या भागांसाठी ऑरेंज आणि रेड अलर्ट जारी केला आहे. याशिवाय, विदर्भात वादळी वाऱ्यासह (४०-५० किमी/तास) हलका ते मध्यम पाऊस पडण्याची शक्यता आहे. मध्य महाराष्ट्र आणि मराठवाड्यातही तुरळक ठिकाणी पाऊस आणि वादळी वारे अपेक्षित आहेत.

हवामान खात्याच्या मते, अरबी समुद्रातील चक्रीवादळासारख्या परिस्थितीमुळे पावसाला पोषक वातावरण तयार झाले आहे. कोकणात गेल्या काही दिवसांत २२७७% अतिरिक्त पाऊस नोंदवला गेला आहे, तर विदर्भात ४२१% जास्त पाऊस झाला आहे. यामुळे शेतकऱ्यांना पेरणीची घाई न करण्याचा सल्ला देण्यात आला आहे. मुंबई, ठाणे आणि दहाणूसारख्या शहरांमध्ये हलका ते मध्यम पाऊस अपेक्षित आहे. नागरिकांना सतर्क राहण्याचे आणि पूरप्रवण भागात खबरदारी घेण्याचे आवाहन करण्यात आले आहे.