Rain in Maharashtra : मराठवाड्यात आभाळ फाटलं! अनेक जिल्ह्यांमध्ये धडकी भरवणारा पाऊस, पाहा VIDEO

सप्टेंबर महिन्याच्या सुरुवातीलाच राज्यात पावसाचा जोर वाढला असून मराठवाडा आणि विदर्भाला पावसाने अक्षरश: झोडपून काढलंय. मराठवाड्यातील छत्रपती संभाजीनगर, जालना, बीड, हिंगोली, नांदेड आणि लातूर जिल्ह्यात ढगफुटीसदृश्य पाऊस झालाय. पावसामुळे नद्या-नाले तुडूंब झाले असून रस्त्यांना नद्याचं स्वरुप आलंय. त्यामुळे अनेक गावांचा संपर्क तुटलाय.

मुसळधार पावसामुळे पूरस्थिती निर्माण होऊन जमिनी खरडून गेल्या आहेत. त्यामुळे खरीप हंगामातील पिकांचं मोठं नुकसान झालंय. संभाजीनगर जिल्ह्यातील, पैठण, फुलंब्री, सिल्लोड, सोयगाव, वैजापूर आणि गंगापूर तालुक्यात विक्रमी पाऊस झालाय.

नांदेड जिल्ह्यातील किनवट, माहूर, हदगाव, हिमायतनगर या तालुक्यात सर्वाधिक पावसाची नोंद झाली आहे. हिंगोली आणि परभणी जिल्ह्यातही जोरदार पाऊस झाला असून नद्या-नाले दुथडी भरून वाहत आहेत. बीड जिल्ह्यात रविवारी सकाळपासून जोरदार पाऊस होत असून परळीसह परिसरात अनेक नद्यांना पाणी आले आहे. यामुळं जनजीवन विस्कळीत झालंय.