Maharashtra Politics: शिंदेंच्या नवनिर्वाचित नगरसेवकाला दणका, पोलिसांकडून गुन्हा दाखल

छत्रपती संभाजीनगर महानगरपालिकेमध्ये विजयी झाल्यानंतर शिंदेसेनेचे अभिजीत जीवनवाल या नवनिर्वाचित नगरसेवकाने मिरवणुकीत तलवार नाचवली होती. या नगरसेवकाने पराभूत झालेल्या विरोधी पक्षाच्या उमेदवाराच्या घरासमोरून रॅली काढत तलवार दाखवली होती. त्यावरून वेदांत नगर पोलिस ठाण्यामध्ये त्या नवनियुक्त नगरसेवकाविरोधात गुन्हा दाखल झाला. दुसरीकडे त्याच प्रभागांमध्ये पालकमंत्री संजय शिरसाट यांची कन्या हर्षदा शिरसाट आणि त्यांचा पीए राजू राजपूत यांनीही विजयी मिरवणूक काढताना तलवार नाचवली होती. मात्र या दोघांवर गुन्हा दाखल केला नाही. आता यावरून माजी खासदार आणि एमआयएमचे प्रदेशाध्यक्ष इम्तियाज जलील यांनी प्रश्न उपस्थित केलाय. कायदा आणि न्याय हा श्रीमंतासाठी वेगळा आणि गरिबासाठी वेगळा असतो का? असा प्रश्न उपस्थित करीत पोलिसांना याबद्दल विचारणार असल्याचं त्यांनी सांगितले.