विधानसभेतला राडा भोवला, पडळकर अन् आव्हाड समर्थकांना तुरुंगवासाची शिक्षा|VIDEO

मुंबई येथे झालेल्या पावसाळी अधिवेशनादरम्यान राष्ट्रवादी कॉँग्रेस शरद पवार गटाचे आमदार जितेंद्र आव्हाड आणि भाजपचे आमदार गोपीचंद पडळकर यांच्या समर्थकांमध्ये जोरदार राडा झाला होता. त्यानंतर आज पडळकर कार्यकर्ते ऋषिकेश टकले आणि आव्हाड समर्थक नितीन देशमुख या दोघांवर मोठी कारवाई करण्यात आली आहे. पडळकर आणि आव्हाड यांच्या कार्यकर्त्यांनी विधानसभेत झालेली धक्काबुक्की प्रकरणी विधानसभेत विशेष अधिकार समितीचा अहवाल सभागृहात सादर करण्यात आला आहे.

विधानसभा विशेषाधिकार समितीने जितेंद्र आव्हाड आणि गोपीचंद पडळकर यांच्या समर्थकांना २ दिवसांच्या कारावासाची शिक्षा सुनावली आहे. १७ जुलै २०२५ रोजी विधानभवनात झालेल्या धक्काबुक्कीप्रकरणी नितीन देशमुख आणि सर्जेराव टकले यांच्यावर ही कारवाई करण्यात आली आहे. तसेच, त्यांना २०२९ पर्यंत विधानभवनात प्रवेशबंदी घालण्याची शिफारस समितीने केली आहे. अभ्यागतांच्या सुरक्षेसाठी कडक नियमावली आणि पोलीस पडताळणीची अंमलबजावणी करण्याचे निर्देशही अहवालात देण्यात आले आहेत.