Maratha Reservation : मनोज जरांगे यांची ईडी चौकशी करा, खोक्यांचा व्यवहार झालाय; कुणी केली मागणी? पाहा VIDEO

मनोज जरांगे पाटील सातत्याने आंदोलने करून दहशत माजवण्याचं काम करीत आहेत. तसेच ते ओबीसी बांधवांवर दबाव टाकत आहेत. सरकारमधील मंत्री त्यांना रात्री भेटायला येतात आणि बंद दाराआड चर्चा होते. 100 खोक्यांचा अपहार झाल्याचं त्यांनी मान्य केलं आहे. त्यामुळे केंद्र आणि राज्य सरकारला विनंती आहे की, त्यांनी जरांगे यांची ईडी चौकशी करावी, अशी मागणी ओबीसी आंदोलक नवनाथ वाघमारे यांनी केली आहे. ते जालना येथील जाहीर पत्रकार परिषदेत बोलत होते.

राज्यात पुन्हा एकदा मराठा आणि ओबीसी असा आरक्षणाचा वाद रंगला आहे. मराठ्यांना सरसकट कुणबी प्रमाणपत्र देऊन ओबीसी प्रवर्गातून आरक्षण द्या, अशी मागणी करत मनोज जरांगे पाटील अंतरवाली सराटी येथे सहाव्यांदा उपोषणाला बसले आहेत. तर दुसरीकडे या मागणीला विरोध करत ओबीसी नेते लक्ष्मण हाके आणि नवनाथ वाघमारे यांनी देखील वडीगोद्री येथे उपोषण सुरु केले आहे.

त्यामुळे संपूर्ण जालना जिल्ह्याचं वातावरण तापलं आहे. अशातच नवनाथ वाघमारे यांनी मनोज जरांगे पाटील यांच्यावर गंभीर आरोप करत ईडी चौकशीची मागणी केली आहे. त्यामुळे मराठा बांधव आणखीच आक्रमक होण्याची शक्यता आहे.