खळबळ ! भाजप आमदाराचा बंगला पेट्रोल टाकून जाळण्याचा प्रयत्न | VIDEO

संजय जाधव | साम प्रतिनिधी

महाराष्ट्रात खळबळ उडवून देणारी बातमी आहे. भाजपचे आमदार संजय कुटे यांचं जळगाव जामोद येथील निवासस्थान पेट्रोल टाकून जाळण्याचा प्रयत्न करण्यात आला. अतिवृष्टीमुळं शेतीचं नुकसान झालं होतं. त्याचा मोबदला न मिळाल्यानं शेतकरी संतापला आणि त्यानं पेट्रोलची कॅन घेऊन आमदाराच्या बंगल्यात प्रवेश केला. कुटेंच्या स्वीय सहायकानं वेळीच रोखल्यानं पुढील अनर्थ टळला.

आमदार कुटे हे त्यांच्या जळगाव जामोद येथील निवासस्थानी असताना संग्रामपूर तालुक्यातील बावनबीर येथील शेतकरी विशाल याने संजय कुटे यांच्या निवासस्थानाच्या परिसरात प्रवेश मिळवला. हातात पेट्रोलचे कॅन होती. मला अतिवृष्टीमुळे झालेल्या नुकसानीचा मोबदला अद्याप न मिळाल्याने मी आमदारांचा बंगला जाळून टाकतो, असं म्हणत तो बंगल्याच्या प्रवेशद्वारकडे जात होता. त्याचवेळी कुटे यांच्या स्वीय सहायकानं त्याला पकडले आणि पोलिसांच्या स्वाधीन केलं. या प्रकरणी पोलिसांनी संबंधित शेतकऱ्याच्या विरुद्ध गुन्हा दाखल केला आहे. पुढील चौकशी जळगाव जामोद पोलीस करत आहेत.