Maharashtra Politics : शिंदेंच्या शिवसेनेत मोठ्या हालचाली; नेत्यांसोबतच्या बैठकीतील इनसाइड स्टोरी समोर

बारामती विधानसभा आणि राहुरी विधानसभा पोटनिवडणुकीची सध्या चर्चा सुरू असताना, दुसरीकडे एकनाथ शिंदेंच्या नेतृत्वातील शिवसेनेत मोठ्या घडामोडी घडत आहेत. काही दिवसांपूर्वीच संपर्कप्रमुखांच्या नावांची घोषणा केली होती. शिंदे यांचे सुपुत्र आणि खासदार श्रीकांत शिंदे यांच्यावर मोठी जबाबदारी देण्यात आली होती. ही २०२९ च्या लोकसभा आणि विधानसभा निवडणुकीचीही तयारी सुरू असल्याचे बोलले जात आहे. त्यात शिंदे यांनी नुकतीच पक्षाच्या सर्व विभागीय संपर्कप्रमुख, सहसंपर्क प्रमुख, लोकसभा संपर्क प्रमुख यांची ऑनलाइन बैठक घेतली. या बैठकीत नेमकं काय झालं, त्याची इनसाइड स्टोरी समोर आली आहे.

'काम केलं नाही तर डच्चू'

शिवसेनेचे मुख्य नेते एकनाथ शिंदे यांनी पक्षाच्या सर्व विभागीय संपर्कप्रमुख, सह संपर्कप्रमुख, लोकसभा संपर्कप्रमुखांच्या बैठकीत संबंधितांना महत्वाच्या सूचना केल्या. मंत्री-खासदार असल्याचं विसरा आणि कार्यकर्ता म्हणून काम करा, असं त्यांनी सांगितलं. राज्यातील प्रत्येक मतदारसंघात जाऊन बैठका घेण्याच्या सूचनाही केल्या. जे काम करणार नाहीत, त्यांना ताबडतोब डच्चू देणार असल्याचा इशाराही शिंदेंनी दिल्याचे समजते.