Saam Maha Exit Poll : मुक्ताईनगरचा संभाव्य नगराध्यक्ष कोण? भाजपची सत्ता की एकनाथ शिंदे मारणार बाजी?

संजय महाजन, मुक्ताईनगर | जळगाव

मुक्ताईनगर म्हणजे एकनाथ खडसेंचा बालेकिल्ला! तिथल्याच भाजप खासदार रक्षा खडसे या केंद्रात राज्यमंत्री आहेत. पण मुक्ताईनगरच्या पालिका निवडणुकीत हा बालेकिल्ला एकनाथ शिंदेंच्या शिवसेनेने भेदून काढल्याचं चित्र आहे. मुक्ताईनगरमध्ये शिवसेनेच्या संजना पाटील या संभाव्य नगराध्यक्षा होण्याची शक्यता साम टीव्हीने केलेल्या महाएक्झिट पोलमधून व्यक्त करण्यात आली आहे.

साम टीव्ही महाएक्झिट पोलच्या अंदाजानुसार, मुक्ताईनगर पालिकेत शिंदेंच्या शिवसेनेचे १९ नगरसेवक निवडून येतील अशी शक्यता व्यक्त करण्यात आली असून, पालिकेवर शिंदेंच्या शिवसेनेची सत्ता येणार आहे. येथील आमदार चंद्रकांत पाटील हे शिवसेनेचे असून, संजना पाटील यांना नगराध्यक्षपदाची उमेदवारी देण्यात आली. विशेष म्हणजे या ठिकाणी भाजपनेही नगराध्यक्षपदासाठी उमेदवार दिला होता. त्यामुळं ही लढत अधिक रंगतदार झाल्याचं दिसून आलं. भाजपनेही इथं ताकद लावली होती. तर शिवसेनेचे आमदार असल्याने चंद्रकांत पाटील यांची प्रतिष्ठा पणाला लागली होती.