Eknath Shinde : विरोधक चारीमुंड्या चीत झालेत; लाडकी बहीण योजनेवरून एकनाथ शिंदेंचा विरोधकांवर निशाणा, Video

लाडकी बहीण योजना बंड पाडण्यासाठी विरोधक कोर्टात देखील गेले होते. त्यावर कोर्टानेही त्यांना फटकारलं आहे. त्यांचा सुरुवातीपासून या योजनेला विरोध आहे. म्हणून मी माझ्या लाडक्या बहिणींना या सावत्र आणि दुष्ट भावांना त्यांची जागा दाखवायला सांगितलं होतं. आता विरोधक चारीमुंड्या चीत झाले आहेत, अशी प्रतिक्रिया उपमुख्यमंत्री एकनाथ शिंदे यांनी दिली आहे. आज मध्यमांशी बोलताना त्यांनी लाडकी बहीण योजनेवरून सुरू असलेल्या चर्चांवर भाष्य केलं. लाडक्या बहिणींना आम्ही सहावा हप्ता देखील दिला आहे. कोणतीही पात्र लाडकी बहीण या योजनेपासून वंचित राहणार नाही, असंही त्यांनी पुढे बोलताना सांगितलं आहे.

पुढे बोलताना एकनाथ शिंदे यांनी संतोष देशमुख हत्या प्रकरणावर देखील भाष्य केलं आहे. ते म्हणाले की, संतोष देशमुख यांची हत्या ही माणुसकीला काळिमा फासणारी आहे. मुख्यमंत्री फडणवीस यांनी या प्रकरणी एसआयटी आणि सीआयडी चौकशीचे निर्णय योग्य आहेत. त्यात अत्यंत बारकाईने चौकशी सुरू आहे. या प्रकरणातील एकही दोषी आरोपी सुटणार नाही. कानून के हाथ लंबे होते है. नाक दाबल्यावर तोंड उघडलं आणि फरार झालेले आरोपी शरण आले. उरलेल्या आरोपींना देखील पोलीस लवकरच पकडतील. या प्रकरणात विशेष वकील लाऊन फास्टट्रॅक कोर्टात ही केस चालवली जाईल, असं त्यांनी सांगितलं.

दरम्यान, गिरणी कामगारांसाठी देखील लवकरच १ लाख पक्की घरं उभारली जाणार असल्याचं शिंदे यांनी सांगितलं आहे. याबाबतच धोरण तयार झालं आहे. एमएमआर परिसरात गिरणी कामगारांची घरं उभारली जातील, असं एकनाथ शिंदे यांनी म्हटलं आहे.