VIDEO : चंदगडच्या जागेवरून महायुतीत वाद; हसन मुश्रीफ यांनी केला मोठा खुलासा

कोल्हापुरातील चंदगड विधानसभा मतदारसंघाच्या जागेवरून महायुतीत वाद होण्याची शक्यता आहे. महायुतीच्या नियमाप्रमाणे चंदगडची ही जागा विद्यमान आमदाराची असेल मात्र असं असतानाही भारतीय जनता पार्टीचे नेते शिवाजी पाटील चंदगड विधानसभा निवडणुकीच्या रिंगणात उतरलेले आहेत. याबाबत त्यांनी काल जय जवान जय किसान हा मेळावा चंदगडमध्ये घेतला आहे. या मेळाव्याला गोवा राज्याचे मुख्यमंत्री प्रमोद सावंत, केंद्रीय मंत्री मुरलीधर मोहोळ उपस्थित होते. त्यांनी या मेळाव्यातच शिवाजी पाटील यांना येत्या निवडणुकीत मोठ्या प्रमाणात मदत करण्याचा आवाहन या सभेत केल्यानंतर आता या जागेवरून महायुतीत धुसफूस सुरू असल्याचं समोर आलं आहे.

चंदगड विधानसभेचे विद्यमान आमदार हे अजित पवार राष्ट्रवादी गटाचे राजेश पाटील असून महायुतीच्या नियमाप्रमाणे ज्या पक्षाचा स्टँडिंग आमदार त्यालाच उमेदवारी मिळणार आहे. असं असताना आता भाजप नेते शिवाजी पाटील यांनी या जागेवर दावा केल्याने नवीन वाद निर्माण झाला आहे. महायुती मधील घटक पक्ष असणाऱ्या राष्ट्रवादीचेच स्टॅंडिंग आमदार या मतदारसंघात असताना देवेंद्र फडणवीस यांचे निकटवर्तीय भाजपचे नेते शिवाजी पाटील यांनी सुरू केलेल्या निवडणुकीच्या तयारी संदर्भात सध्या राष्ट्रवादी अजित पवार गटाकडून नाराजी व्यक्त होताना दिसत आहे. तर शिवाजी पाटील यांच्याकडून सुरू असलेल्या तयारी संदर्भात अजित पवार हे योग्य दखल घेऊन त्यातून मार्ग काढतील अशी प्रतिक्रिया कोल्हापूरचे पालकमंत्री हसन मुश्रीफ यांनी दिलेली आहे.