Maharashtra Politics : मंत्रिमंडळ बैठकीत वादाचे फटाके, CM शिंदे अन् अजितदादांमध्ये जुंपली? पाहा VIDEO

विधानसभा निवडणुकीच्या अनुषंगाने सध्या राज्य सरकारकडून निर्णयांचा धडाका सुरू आहे. मात्र असं असताना गुरुवारी पार पडलेल्या मंत्रीमंडळाच्या बैठकीत मुख्यमंत्री एकनाथ शिंदे आणि उपमुख्यमंत्री अजित पवार यांच्यात वाद झाल्याची माहिती समोर आली आहे. हा वाद इतका विकोपाला गेला की अजित पवार हे बैठकीच्या अखेरच्या टप्प्यात उठून निघून गेले. मुख्यमंत्री एकनाथ शिंदे यांच्या काही महत्वाकांक्षी प्रस्तावाला मंजूरी न दिल्याने हा वाद झाल्याचं सांगण्यात येत आहे.

विधानसभा निवडणुका तोंडावर असताना महायुतीच्या नेत्यांमधील नाराजी आता उघडपणे समोर येत आहे. काल झालेल्या मंत्रिमंडळ बैठकीमध्ये मुख्यमंत्री एकनाथ शिंदे आणि अजित पवार यांच्यातच वाद झाल्याची माहिती देखील समोर येत आहे. त्यामुळे आता विधानसभा निवडणुकीच्या तोंडावर महायुतीमधील नेत्यांमध्ये असलेली धुसफूस चव्हाट्यावर आली आहे. एका महत्त्वाच्या विषयावर उपमुख्यमंत्री अजित पवार हे नाराज असल्याने त्यांनी मंत्रिमंडळाच्या बैठकीतून अवघ्या दहा मिनिटातच काढता पाय घेतला. त्यापुढे ही बैठक तब्बल दोन ते अडीच तास चालली.

दरम्यान, आता या वादावर विरोधकांनी देखील टीकेची झोड उठवली आहे. सरकार कॅबिनेटमध्ये जनतेसाठी नाही तर स्वत:च्या स्वार्थासाठी वाद घालतं, असं विजय वडेट्टीवार म्हणाले आहेत. तर महायुतीत कधीच काही आलबेल नव्हतं असं खासदार संजय राऊत यांनी म्हंटलं आहे.