छत्रपती संभाजीनगरात अतिक्रमण हटाव मोहीम वेगात; धोकादायक इमारती महापालिकेकडून जमीनदोस्त|VIDEO

छत्रपती संभाजीनगर शहरातील जुन्या भागात असलेल्या रंगारगल्ली, अंगुरीबागेत धोकादायक इमारती जमीनदोस्त करण्यात आल्या. त्याशिवाय अतिक्रमण हटाव मोहिमेला शनिवारपासून सुरुवात होणार असल्याने पैठण रोडला मार्किंग करण्यात आले आहे.

सध्या महानगरपालिकेची अतिक्रमण हटाव मोहीम वेगाने सुरू आहे. अंगुरीबागेतील धोकादायक इमारत महापालिकेच्या अतिक्रमण हटाव पथकाने काल दुपारी पाडली. दुसऱ्या पथकाने याच वेळी रंगारगल्लीत रस्त्यात वाहतुकीला अडसर ठरणारी तीन दुकाने जेसीबीने जमीनदोस्त केली.

महापालिका दरवर्षी धोकादायक इमारतींना नोटीस बजावते. मात्र इमारत मालक याकडे दुर्लक्ष करतात. अनेक ठिकाणी भाडेकरू आणि मालक यांच्यात वाद आहेत. रंगारगल्ली येथील एक धोकादायक इमारत मनपाने मंगळवारी जमीनदोस्त केली. काल मनपाचे पथक अंगुरीबागेत दाखल झाले. रमेश गुगळे यांची इमारत धोकादायक बनली होती. या इमारतीचा वापरही बंद होता. इमारतीसमोरील रस्ता वाहतुकीसाठी दोन्ही बाजूंनी बंद करून दोन जेसीबीने इमारत पाडण्यात आली. गुलमंडी ते सिटी चौक रस्त्यावर रंगार गल्लीत जागेचा मोबदला घेऊनही अतिक्रमणे केली होती. मंगळवारी तीन व्यापाऱ्यांनी साहित्य काढून घेण्यासाठी वेळ मागितला होता. बुधवारी तिन्ही दुकाने हटविण्यात आली.