Thane Fire: ठाण्यात केमिकल टँकरला भीषण आग; हवेत पसरले धुरांचे लोट, VIDEO

ठाण्याहून गुजरातच्या दिशेने जाणाऱ्या एका केमिकल टँकरला अचानक आग लागल्याची घटना समोर आली आहे. या घटनेनंतर परिसरात मोठी वाहतूक कोंडी निर्माण झाली होती. सुदैवाने, अग्निशमन दलाच्या वेळीच हस्तक्षेपामुळे ही आग नियंत्रणात आणण्यात यश आले. टँकरमध्ये ज्वलनशील केमिकल असल्याने आग पसरल्यास गंभीर परिणाम होण्याची शक्यता होती. या घटनेमुळे पुढील चार ते पाच तास वाहतूक पूर्णपणे विस्कळीत होण्याची शक्यता होती, मात्र आग आटोक्यात आल्यामुळे मोठा अनर्थ टळला आहे. सध्या या भागातील वाहतूक सुरळीत करण्याचे काम युद्धपातळीवर सुरू असून, वाहतूक विभाग आणि पोलिस यंत्रणा घटनास्थळी कार्यरत आहेत. ठाणे-घोडबंदर मार्गावरील नागरिकांना सतर्कतेचा इशारा देण्यात आला असून, शक्य असल्यास पर्यायी मार्गांचा वापर करण्याचे आवाहन पोलिसांकडून करण्यात आले आहे.