Baramati News : बारामतीचा सस्पेन्स कायम; युगेंद्र पवारांच्या नावावर शिक्कामोर्तब?

शरद पवार यांच्याकडून बारामतीबाबत सस्पेन्स कायम ठेवण्यात आलेला आहे. बारामतीतून एकाही इच्छुक उमेदवाराची मुलाखत बघायला मिळालेली नाही. त्यामुळे विधानसभेला बारामतीतून कोण निवडणूक लढवणार याकडे सगळ्यांचं लक्ष लागलं आहे.

विधानसभा निवडणुकीसाठी राष्ट्रवादी शरदचंद्र पवार गटाकडून इच्छुक उमेदवारांच्या मुलाखती पुण्याच्या निसर्ग मंगल कार्यालयात होत आहेत. गेल्या 5 दिवसांपासून या मुलाखती सुरू आहेत स्वत: शरद पवार या मुलाखती घेत आहेत. मात्र यात बारामतीसाठी एकाही इच्छुक उमेदवाराची मुलाखत घेण्यात आलेली नाही. त्यामुळे बारामतीच्या उमेदवाराबद्दल सस्पेन्स कायम आहे. तर दुसरीकडे बारामतीतून युगेंद्र पवार यांच्या नावाची चर्चा होत आहे. आता बारामतीतून कोणीच इच्छुक न आल्याने युगेंद्र पवार यांच्या नावावर शिक्कामोर्तब झालं आहे. युगेंद्र पवार यांची तब्बेत खराब असल्याने ते इच्छुक म्हणून मुलाखतीसाठी येऊ शकले नाही. मात्र बारामतीचं एक शिष्ठमंडळ येऊन शरद पवार यांना आणि मुलाखत घेणाऱ्या पक्षश्रेष्ठींना भेटून गेलं असल्याचं खासदार सुप्रिया सुळे यांनी सांगितलं आहे.