Maharashtra Politics: माजी मंत्र्यासह या दिग्गज नेत्यांचा भाजपमध्ये प्रवेश, उत्तर महाराष्ट्रात ठाकरे गटाला सुरुंग|VIDEO

गेल्या पंधरा दिवसांपासून ठाकरे गटाचे माजी उपनेते सुधाकर बडगुजर यांच्या प्रवेशाला भाजपच्या नाशिक पश्चिमच्या आमदार सीमा हिरे यांच्यासह अनेक पदाधिकाऱ्यांनी विरोध करून रान उठवले होते. मात्र हा विरोध मोडीत काढून अखेर बडगुजर यांना भाजपने पक्षात प्रवेश दिला. आज मोठ्या गाजत वाजत हा प्रवेश सोहळा पार पडला. तसेच त्यांच्यासोबत ठाकरे गटाचे नेते माजी मंत्री बबन घोलप यांचाही भाजपमध्ये प्रवेश झाला. बबन घोलप यांच्या कन्या माजी महापौर नयनाताई घोलप यांनीही कमळ हाती घेतले.

मनसेतून ठाकरे गटात गेलेले माजी महापौर अशोक मूर्तडक यांना महापालिकेची निवडणूक महत्वाची आहे. तर भाजपला एकापेक्षा अधिक ओबीसी चेहऱ्यांची गरज आहे. त्यांनीही भाजपमध्ये प्रवेश केला आहे. तसेच मनसेचे महत्वाचे मानले जाणारे नेते माजी नगरसेवक दिलीप दातीर हे देखील भाजपमध्ये विलीन झाले आहे. यामुळे उत्तर महाराष्ट्राची राजधानी असलेल्या नाशिकमध्ये ठाकरे गटाला सुरुंग लागल्याचे राजकीय जाणकारांचे म्हणणे आहे.