Ajit Pawar : अजित पवारांचं टेन्शन वाढलं? जागावाटपाच्या बैठकीला अनेक आमदारांची दांडी!

Maharashtra Politics : अजित पवार यांच्या निवासस्थानावर राष्ट्रवादी काँग्रेसच्या आमदारांची बैठक पार पडली. बुधवारी रात्री झालेल्या या बैठकीत आमदारांकडून मतदारसंघातून आढावा घेण्यात आला. बैठकीला सर्व आमदार यांना उपस्थित राहण्याचे आदेश असताना अनेक आमदार गैरहजर राहिले होते. वैयक्तिक कारण देत काही आमदारांनी दांडी मारली. मिळालेल्या माहितीनुसार, आमदार इंद्रनील नाईक यांच्या मतदारसंघात घाटी गणेश विसर्जनाचा कार्यक्रम असल्याने अनुपस्थित होते. तर नवाब मलिक हे ही आजच्या बैठकीला अनुपस्थित होते.

अजित पवारांच्या राष्ट्रवादीच्या बुधवारी बैठक झाली, त्यामध्ये आगामी विधानसभा निवडणुकीच्या जागा वाटपावर चर्चा झाली. राष्ट्रवादी काँग्रेसकडून जवळपास ७० जागांची मागणी करण्याचा या बैठकीत निर्णय घेण्यात आला आहे. त्याशिवाय सध्याच्या विद्यमान आमदारांपैकी कोणाचेही तिकीट कापले जाणार नाही, अशी हमीही प्रमुख नेत्यांकडून देण्यात आली.